Пожарот на Тасос е локализиран – изгореа куќи и туристички комплекси
Објавено во: Балкан 12 Септември, 2016
Пожарот на грчкиот остров Тасос веќе е локализиран.
На одделни места уште тлеат огништа, кои од време на време се разгоруваат од налетот на ветрот, но и неговата сила веќе слабее. Пожарникари и доброволци цела ноќ се бореа со пожарот. Околу 270 пожарникари дошле на островот, за да го локализираат пожарот.
При борба со стихијата повредени се четворица пожарникари, на кои им е укажана лекарска помош. Локалните жители раскажуваат дека не се плашат од огнот и немаат намера да ги напуштаат своите домови, освен ако пожарот не стигне во непосредна близина на нивните куќи. Меѓу туристите исто така нема паника и тие не ги прекинуваат одморите.
Грчкиот премиер Алексис Ципрас денеска ќе го посети островот Тасос. Тој ја откажа посетата на Кефалонија и оди на Тасос со министрите за внатрешни работи и за транспорт и инфраструктура, генералниот секретар за безбедност и со командирот на противпожарната служба, за да изврши увид во ситуацијата на островот по катастрофалниот пожар во кој е изгорен голем дел од планинскиот појас, плантажи со маслинки, десетина куќи и туристички комплекси.