Познато колку пеховите ја чинеа македонската железница

Добивај вести на Viber

МЖ Инфраструктура загуби милиони во последниот квартал од минатата година поради оштетениот армирано-бетонски мост за време на истиот период кај Градско како и откажувањето на меѓународната патничка линија Белград - Скопје - Солун поради неисплатливост, објави во вчерашниот извештај за 2018-та едно од двете главни македонски железнички претпријатија.

Приходите од надомест на користење на македонските пруги и останатата инфраструктура се намалени за речиси една третина споредбено квартално. Ако во послендите три месеци од 2017-та тие биле 122 милиони денари, во истиот период лани тие паднале на 93,8.

- Намалувањето е резултат на намалувањето на возните километри реализирани како во патничкиот, така и во товарниот сообраќај - се вели во извештајот на МЖ Инфраструктура.

Според ова, може да се заклучи дека санирањето на 49-години стариот мост го погодил и прометот на домашните компании кои го користат солунското пристаниште за увоз или извоз на производи како и за снабдување со деривати. Засега нема информации колкава е загубата и на МЖ Транспорт.

Извештајот на „Инфраструктура“, во патничкиот сообраќај покажува дека возните километри во октомври, ноември и декември лани се намалиле за 22,38 отсто во однос на истиот период лани, а во товарниот железнички сообраќај намалени се за 8,25 отсто.

Поради деформација на бетонскиот мост помеѓу Градско и Кукуричани возовите од СКопје не можеа да одат до Гевгелија од 29 септември до 8 ноември, а во меѓувреме Владата издвои сума на пари за итна санација на носечкиот столб и напукнувањето.

Од 19 септемрви лани поради неисплатливост на српската железница, а во согласност на грчката, одреден период укинати се двата воза 334 и 335 на релација Белград - Скопје - Солун и обратно.

А.К.