Пратеници предложија измени на закон со кој ќе се затворат рудници?

Добивај вести на Viber

Македонската асоцијација за рударство обвини дека пратеници од владејачкото мнозинство предложиле измени во Законот за минерални суровини, со кои велат практично ќе ги затворат трите рудници за олово и цинк, Саса, Злетово и Тораница. 

Со измените се бара да не се користи цијанид во технолошкиот процес, што според претставниците на рударскиот сектор е вообичаена и дозволена постапка и во земјите од Европската Унија.

Македонската асоцијација за рударство бара од Собранието и од Владата да организираат широка јавна расправа, со учество на научната јавност, на која би бил разгледан предлогот за изменување и дополнување на Законот за минерални суровини по скратена постапка, поднесен од 10- тина пратеници од различни партии, кој е веќе во собраниска процедура.

Според рударската асоцијација со него неселективно се забранува користењето опасни супстанци, меѓу кои и на цијанидни соединенија. И покрај тоа што рудниците имаат „А“ и „Б“ интегрирани еколошки дозволи, со ова практично би се затвориле домашните рудници, велат од нивната асоцијација.

Со тоа се загрозува иднината на повеќе од 13.500 директно вработени во овој сектор.