Добивај вести на Viber
Стартува нов проект за заштита на потрошувачите, вреден над 1,3 милиони евра, што Министерството за економија го реализира во соработка со делегацијата на Европската унија во Скопје, најави министерот за економија Беким Незири.
Проектот „Хармонизација на законодавството и градење на капацитетите во областа на заштитата на потрошувачите“ е поделен во два дела. Првиот, во вредност од 700.000 евра, има за цел комплетно усогласување на националното законодавство со законодавството на ЕУ, зајакнување на институционалните и технички капацитети за ефикасно решавање на потрошувачките прашања во земјата, подигање на јавната свест за правата на потрошувачите, вклучувајќи и континуирано информирање на потрошувачите за безбедноста на производите.
Вториот дел од проектот, пак, е грант договор во вредност од 630.000 евра, наменет за зајакнување на невладиниот сектор, односно е наменет за невладините организации од областа на заштита на потрошувачите.
Конфинансирањето од македонскиот Буџет ќе биде во висина од 10% од вкупните средства издвоени за проектот.
„Досега, во двогодишните програми за заштита на потрошувачите, средствата што беа превидени за оваа намена беа премали за да може да се направи поголем исчекор во овој дел, односно во 2012 година беа издвоени 530.000 денари, во 2013 - 500.000 денари, а за оваа година 550.000 денари. Покрај тоа што за следната година ќе се обидам да овозможам барем тројно повеќе средства за потрошувачите и нивните права, сметам дека овој проект кој денеска го промовираме може да овозможи остварување на нашата цел, а тоа е воспоставување на функционални механизми за соработка со невладините организации, подготвени административни капацитети, како и создавање на силна правна рамка за заштита на потрошувачите, поточно секој потрошувач во Македонија да ги ужива сите права како и европскиот потрошувач“, вели Незири.
Меѓу првите резултати од отпочнување со овој проект ќе биде постоењето на построги правила за компаниите и давателите на услуги за почитување на правата на потрошувачите.