ПРЕД УТРЕШНАТА ПОСЕТА НА ГРЦИЈА, ДИМИТРОВ ЗА ВИМА: Колку побрзо влеземе во НАТО, толку подобро за Грција

Добивај вести на Viber

Колку побрзо Македонија ќе стане членка на НАТО, толку подобро ќе биде за Грција, изјавил новиот министер за надворешни работи Никола Димитров во интервју за грчкиот весник „Вима“. 

Во пресрет на посетата на Атина, планирана за утре, Димитров вели дека е подготвен да води конструктивни преговори, за да се најде решение за името на земјата. 

„Спорот за името трае многу години. Иако во суштина е билатерално, тој може да ја стави под закана регионалната стабилност. Република Македонија веќе подолго време е во состојба на неизвесност, и стои во чекалната пред вратите на НАТО и ЕУ, заклучени поради политичка изолација и покрај одлуката на Меѓународниот суд на правдата во Хаг. Тоа го отвори патот кон демократската криза во земјата“, рекол Димитров за „Вима“. 

Првиот македонски дипломат наведува дека новата реформска влада на чело со Зоран Заев одлучила да се надмине оваа криза.

„Вима“ пишува дека Димитров е еден од најдобрите специјалисти за темата за името, бидејќи бил преговарач, а во критичниот период пред Самитот на НАТО во Букурешт во април 2008, рече дека во Скопје „треба да признаат дека и тие направија грешки“.

„За Грција прашањето е: каков сосед сака да има? А за Македонија, прашањето е: каков сосед сакаме да бидеме? Колку побрзо нашата земја биде поканета за членка на НАТО, толку подобри ќе се изгледите Грција да има таква држава за свој сосед. Јас сум оптимист дека во најскоро време ќе започнеме преговори и за влез во ЕУ, по толку позитивни препораки дадени од Европската комисија“, истакнал министерот Димитров.