Предлог мерки за финансиска поддршка на студентите
Објавено во: Македонија 24 Април, 2020
Како привремена економска мерка и решение за неповолната финансиска ситуација во која се најдоа студентите по прогласување на вонредната состојба, Универзитетското студентско собрание на Универзитетот „Св. Кирил и Методиј“ предлага воведување на вонредни социјални стипендии за студентите и тоа:
1. Вонредна социјална стипендија за студентите од семејства со низок доход
(семејства со низок доход се семејства со месечни примања до 14 000 денари по член на семејство);
2. Вонредна социјална стипендија за студентите кои ќе приложат доказ дека еден или повеќе од членовите на семејството останале без работно место како последица од вонредната состојба;
Лошата економска ситуација која во претстојниот период дополнително ќе се продлабочи е проблем кој не ги избегна ниту студентите. Голем дел од нив го финансираат своето образование од приходите на семејството, кои сега дополнително ќе бидат скратени, или пак од хонорарни и привремени ангажмани кои не се опфатени од досегашните мерки на Владата.
„Ваквата кризна состојба може да се надмине само со стабилно и систематско дејствување па затоа ги повикуваме надлежните институции да ги преземат потребните мерки со кои ќе се помогне на ранливите категории и студентите чии финансии енормно ќе бидат скратени во претстојниот кризен период. Покрај ваквите краткорочни мерки, за целосно решавање на кризната состојба потребни се и значително поголеми системски промени. Затоа дополнително ги повикуваме надлежните институции на нови разговори со цел креирање на долгорочни економски мерки кои ќе бидат донесени во претстојниот период со цел да се помогне на студентите кои ќе бидат најпогодени од ваквата ситуација“, стои во соопштението.