Прераспределувања во Кривичен, кој каде заминува?

Добивај вести на Viber

Основниот суд Скопје информираше дека како дел од организациските промени на годишниот распоред на судиите во овој суд донесени се дополнителни одлуки за прераспоредувања на судии.

„Судијата Дијана Груевска Илиевска е определена за заменик на претседателот на Основен суд Скопје 1 – Скопје на местото на судијата Ивица Стефановски кој по негово лично барање  не е повеќе заменик претседател.

Судијата Гордана Спиреска е определена за претседател на Оддел – кривично полнолетни, од причини што досегашниот претседател на одделот, судијата Сандра Крстиќ по нејзино лично барање е прераспоредена во друг оддел.

Поради истите причини, судијата Сандра Крстиќ исто така е прераспоредена од Одделението за организиран криминал и корупција во Одделот кривично претходна постапка“, се вели во соопштението.

Крстиќ инаку беше одредена да го води предметот на новинарот Зоран Божиновски, обвинет во случајот „Шпион“, кое минатата недела повторно беше одложено. 

Судијката Ленка Давиткова пак, од одделот Кривично полнолетни, е префрлена да постапува како судија по предмети по кои досега постапувала судијката Крстиќ со цел да не дојде до одолжување на судските постапки и итното постапување по притворските предмети, пренесе Академик.

Од кривичниот суд додаваат дека во следниот период ќе бидат објавени и другите нови одлуки за прераспоредување во зависност од потребите, со цел, според нив, „да не би се довело во прашање постапувањето на судот“.