Прогресивното оданочување останува приоритет на Владата

Добивај вести на Viber

Владата останува доследна на воведувањето прогресивно оданочување преку инклузивен процес на разговори и креирање консенсуз. Исто така, ќе се отвори процес на разговори за даночниот систем во поглед на соодносот меѓу директните и индиректните даноци, односно за соодносот на оданочување на имотот, доходот и потрошувачката според примерот на развиените земји и спецификите на нашата економија.

-Остануваме посветени на праведноста во оданочувањето, со понуда на осмислен систем на прогресивното оданочување на вкупните лични приходи, по претходно сериозна и детална анализа и јавна дебата, со фокус на реконфигурирање на концептот на личен доход (семеен доход) и воведување данок на луксуз, се наведува во владината програма.

Прогресивното оданочување по една година беше ставено во мирување за 36 месеци поради непостигнување на целите.

Анализата направена и претставена тогаш покажа дека  приходите кои можеле да се приберат од прогресивното оданочување и повисоката стапка на личен доход се помали за 51,2 отсто во однос на потенцијалот. Вкупно изгубените приходи што можеле да се приберат, а не се прибрале, се оценети на 6,5 милиони евра, односно средства што не се слеале во буџетот поради промената на однесувањето на даночните обврзници.

Ставањето во мирување го најави тогашната министерка за финансии Нина Ангеловска која рече дека не станува збор за укинување туку за ставање во мирување на прогресивното оданочување.

Тие 36 месеци, според укажувањата Министерството ќе се посвети на утврдување соодветно решение за ефикасна и ефективна примена на прогресивното оданочување, со разгледување на различните мислења, со подигнување на даночниот морал и со јакнење на механизмите за минимизирање на сивата економија.