Прв чекор за укинување на роамингот во регионот – црногорските оператори најмногу се против!

Добивај вести на Viber

Претставниците на Македонија, Србија, Босна и Херцеговина, Црна Гора и Албанија утре во Будва ќе потпишат спогодба, која е прв чекор кон укинување на тарифите за роаминг во регионот. Доколку се реализира, спогодбата ќе значи далеку пониски цени за македонските граѓани за разговорите од овие балкански земји, во споредба со оние што се плаќаат досега. Спогодбата предвидува постепено намалување на цените за роаминг, а е подготвена на сличен начин како што тоа е направено во земјите од Европската унија. „Ние со оваа спогодба, овие пет држави, постапуваме на целосно ист начин, предвидуваме во следните три години да дојде до намалување на цените во роаминг во согласност со уредбата на ЕУ, која ги регулира цените меѓу земјите-членки на Унијата“, вели српскиот министер за трговија, туризам и телекомуникации Расим Љајиќ. Во тие три години, земјите-потписнички се обврзуваат цените за роаминг да ги изедначат со оние во внатрешниот сообраќај. Идејата наиде на најголем отпор во Црна Гора, каде што оператерите се плашат од намален профит, затоа што оваа земја, заради големиот број туристички посети, остварува најголем дел од приходите за роаминг. Сепак, властите, откако увиделе дека операторите не се согласуваат со намалување на цената, одлучиле да одат на принудна варијанта - односно да ги обврзат операторите да ја почитуваат спогодбата и без нивна согласност. Надлежните уверуваат дека намалените цени ќе се компензираат со зголемен сообраќај. „Слична беше ситуацијата и со земјите во ЕУ, и таму операторите не ја прифатија идејата со воодушевување, но на крај сите се согласија дека има уредба која треба да се почитува“, вели Љајиќ. Спогодбата што ќе се потпише утре треба да ги дефинира појдовните основи и елементите за одредување на динамиката на намалување на цените за роаминг. Штом спогодбата ќе се потпише, надлежните министерства треба да ги започнат процедурите за донесување на законските прописи со кои укинувањето на роаминг тарифите ќе се реализира.