Првата даночничка се врати во својата матична институција - Сања Лукаревска пред нови предизвици

Добивај вести на Viber

Директорката на Управата за јавни приходи, Сања Лукаревска, се врати во својата матична институција. Веднаш на средби со колегите и состаноци околу работењето на еден од најзначајните државни органи во земјава - оној кој ги собира даноците и другите давачки од граѓаните и компаниите. 

Сања Лукаревска, откако беше избрана за пратеничка во Собранието, поднесе оставка од позицијата директор на УЈП и ја извршуваше функцијата народен избраник. 

Пред три дена, пак, Владата ја именуваше повторно за прв човек на даночната администрација. 

„Продолжуваме каде што застанавме. Уште поамбициозно, уште порешително. Изминатите години докажавме дека можеме да бидеме партнери со граѓаните. Продолжуваме да работиме заедно со нив. Обезбедуваме средства за подобар живот за сите, креираме мерки со кои го зголемуваме семејниот буџет. Ви благодарам за поддршката и довербата.Токму тие нè обврзуваат мене и мојот тим да бидеме уште поуспешни. We’re back!“, напиша Лукаревска на својот фејсбук профил.

Како што е познато, корона кризата ја намали економската активност во земјава, а сето тоа ги редуцира и приливите што по основ на даноци и други давачки се собираат во државната каса. Ова, а и бројните даночни реформи што се најавуваат за наредниот период, ќе бидат главните предизвици со кои во наредниот период ќе се соочи Лукаревска.