Путин: Нема преговори со Зеленски, му истече мандатот

Добивај вести на Viber

Рускиот претседател Владимир Путин денеска изјави дека украинскиот претседател Володимир Зеленски нема легитимитет по истекот на неговиот петгодишен мандат и дека тоа би претставувало правна пречка доколку Русија и Украина ги продолжат мировните преговори.

Со оглед на тоа што Украина сè уште е во целосна војна, Зеленски не се соочи со избори, и покрај тоа што неговиот петгодишен мандат заврши оваа недела. Сојузниците на Украина сметаат дека таквата одлука е правилна со оглед на околностите на војната. 

Путин е подготвен да ја заврши војната со договорен прекин на огнот што ќе ги признае сегашните борбени линии, објави Ројтерс, повикувајќи се на четири руски извори. Се додава дека Русија е подготвена да ја продолжи борбата доколку Киев и Западот не одговорат.

По ова се огласи Путин кој рече дека статусот на Зеленски е „проблематичен“ на прес-конференција емитувана на државната телевизија за време на неговата посета на Белорусија.

„Со кого да се преговара? Ова не е реторичко прашање... Заврши легитимитетот на актуелниот шеф на државата“, рече тој.

Путин рече дека Западот ќе ја искористи конференцијата за војната во Швајцарија за да го поддржи легитимитетот на Зеленски, но дека тоа се „ПР чекори без правна тежина“.