Расте цената во Скопје, но и во другите градови: Познато колку бил просекот за метар квадратен лани
Објавено во: Економија 26 Март, 2019
Просечната цена на метар квадратен на становите во Македонија има падови и скокови во текот на целата 2018-та, но сумирајќи ги резултатите на годишно ниво, Државниот завод за статистика заклучува дека тие поскапеле за 3,2 отсто повеќе во однос на 2017-та.
Просечната цена на метар квадратен станбена површина во 2018 година била 43 155 денари. Најголем раст на цената разбирливо има во Скопје, каде во просек вредноста била 46 764 денари, што е за 7,0 отсто, или 50 евра, повеќе во споредба со една година претходно. Во внатрешноста на земјата цената е 33 157 денари, што е за 3.6 % повеќе во споредба со 2017 година.
Наведените просечни цени на 1 м2 станбена површина се без данок на додадена вредност. Речиси идентични се податоците на НАродна банка со оние на Заводот.
Претходно, според податоците на Агенцијата за катастар на недвижнини на истекот на ланската година во главниот град биле регистрирани 312.904 станови, од кои под хипотека биле заложени кај кредиторите 57.106 од нив, што е 18,2 отсто од вкупниот број.
На ниво на Македонија процентот е помал и од вкупно 1.071.000 станови, под хипотека кај банките се регистрирани 122.307, односно 11,4 од овие недвижнини.