Над 170 држави ја ратификуваа во Сеул спогодбата за меѓународниот протокол за борба против шверцот на цигари.
Спогодбата има за цел да ја усогласи борбата против нелегалната трговија со цигари, која учествува со 11 проценти на светскиот пазар и државите ги чини најмалку 40 милијарди долари годишно, поради неплатените акцизи. Меѓу мерките кои се содржани во спогодбата се обврзување на владите да ги лиценцираат производителите, а кутиите со производите од тутун да бидат маркирани, со цел лесно да им се влезе во трага.
- Таа спогодба ќе ја промени ситуацијата, нагласи генералниот директор на Светската здравствена организација, Маргарет Чан.
Во Сеул се одржа министерска конференција на земјите потписнички на рамковната конференција на СЗО за контрола на тутунските производи, која е ратификувана од 176 земји од 2005 година досега. Во 2007 година земјите од конвенцијата одлучија да почнат преговори за создавање на протоколот за борба против шверцот на тутунски производи.
Само 20 држави не ја ратификувале конвенцијата, а меѓу нив се и САД, Швајцарија, Индонезија, Аргентина и Чешка.