Револуција во ГТЦ! Колкав профит донесе „сатарот“ за партиски вработувања?

Добивај вести на Viber

Голем пресврт кај државната фирма која последен пат беше актуелна пред неколку години во политичката пародија „Го гушкаме ГТЦ“ ! Последниот финансиски резултат за првиот квартал ветува дека ГТЦ може да го врати стариот сјај и беспрекорната репутација од минатиот век. Особено затоа што податоците од финансискиот биланс укажуваат на револуција во работењето на државна фирма! ГТЦ во првиот квартал ги скратил трошоците за вработените за 34%!!!

Градскиот трговски центар (ГТЦ) Скопје оствари добивка од 130.000 евра за период од 100 дена работа од почетокот на годинава до крајот на март. Ова е вест која заслужува внимание.

ГТЦ веќе подзаборавената државно поседувана компанија за издавање и одржување деловен простор народски кажано „се враќа од мртвите“. Финансискиот резултат е спектакуларен и е за почит. Очигледно дека менаџментот на компанијата сериозно, ангажирано и посветено ја бркал својата работа во периодот што измина.

Верувале или не, ГТЦ во првите три месеци годинава има просечен дневен профит од 1.300 евра!

Особено затоа што сме соочени со негативно економско опкружување креирано од галопирачката инфлација, бројни бизнис неизвесности чиј катализатор се пред се цените на нафтените деривати, природниот гас и на струјата.

Во услови кога во ГТЦ има дуќани „кои зјаат празни“ менаџментот успеал да ја консолидирана состојбата да ги оптимизира ресурсите и да ги намали трошоците за 8 отсто односно за 75.000 евра во споредба со истиот квартал лани.

И при тоа успеа да ги зголеми приходите за 5 отсто. За првите три месеци ГТЦ успеа на ја надмине психолошката бариера и оствари приход што надмина еден милион евра. 

Најголемата трошковна ставка се услугите со карактер на материјални трошоци за кои компанијата издвоила 623.000 евра или 11 отсто повеќе од лани. За своите вработени друштвото исплатило 265.000 евра што е за 34 отсто помалку од истиот период лани. Ова значи дека ГТЦ клучната разлика ја направил со кастрење на трошоците за вработените. Тоа може да значи три работи: едната е намалување на платите за целиот колектив, другата е намалување на бројот на вработени и трета е комбинација од двете претходни варијанти.

Како и да е доколку компанијата продолжи со истото работење и успее да одолее на партиските притисоки кои државните и јавни претпријатија ги гледаат како места за „ухлебување“ партиски кадри, сигурно дека позитивниот резултат нема да изостане. 

Само за дополнување на контекстот: лани ГТЦ годината ја заврши со загуба од 650.000 евра, претходната 2021 година беше во загуба од 581.000 евра, а во 2020 година „дупката“ беше околу 660.000 евра.

Р.Ф.