Рикер повторно во Македонија: За надминување на спорот клучно беше лидерството

Добивај вести на Viber

За надминување на спорот за името помеѓу Скопје и Атина, кој навидум не можепе да се реши, клучно беше лидерството, смета идниот помошник државен секретар за европски и евроазиски прашања Филип Рикер.

Посочи дека грчкиот премиер Алексис Ципрас и премиерот Зоран Заев, како и шефовите на дипломатиите на двете земји се заслужни за ова историско постигнување и верува дека и останатите лидери на Западен Балкан ќе земат пример од ова искуство.

Поранепниот амбасадор на САД во Македонија во обраќањето на тема „Економскиот развој и регионалните односи во Југоисточна Европа“ во рамки на проектот „Балкан 360“, во организација на Германскиот Маршалов фонд, истакна дека Северна Македонија е на вистинскиот пат, кон НАТО и ЕУ. 

Политичкиот советник на командантот на Европската воена команда на Воените сили на САД се осврна на клучните предизвици на западнобалканските држави и на американската поддршка во напорите на овие земји да станат дел од Европа.

– Како поранешен офицер за односи со јавност и подоцна американски амбасадор во Скопје пресреќен сум што сум тука. Особено е значајна мојата посета сега, бидејќи Северна Македонија презеде чекор напред кон нејзиното вистинско место во Европа и НАТО. Како што знаете се враќам во Вашингтон за некоку недели да застанам на чело на Бирото за европски евроазиски прашања како помошник државен секретар, рече Рикер.

Рикер оцени дека 27 години заемната недоверба и историските несогласувања меѓу Скопје и Атина го блокираа патот на земјата напред.

– Од мое лично искуство можам да ви кажам дека ова прашање беше исклучително комплексно и многумина го сметаа неподносливо. Да се дојде до оваа точка не беше лесно. Лидерите повеќепати сакаа да се откажат од процесот и да одат напред. Успехот на Преспанскиот договор е доказ дека со посветената работа и компромис може да се постигне решение и за тоа е клучно лидерството, рече Рикер.