Рокот за откуп и закуп на државни станови истекува денеска
Објавено во: Економија 31 Март, 2015
Точно до денеска (вечерва) е рокот за доставување на барање и изјаснување за начинот на користење на државните станови.
Надлежните информираат дека досега се поднесени околу 1000 барања за за склучување договори за откуп, пренос или за закуп на станови во сопственост на државата кои што се користат бесправно.
За откуп на станови се доставени 769 барања, 188 за пренос, а 28 за закуп.
Според податоците на ресорното Министерство и на АД за изградба и стопанисување со станбен и деловен простор, во државава има над 2.500 станови, коишто се користат безправно, односно се дивовселени дадени под закуп до 2006 година или се општествени станови.
Корисниците на становите кои нема да достават барање ќе ја изгубат можноста за сопственост, односно по автоматизам ќе добијат решенија за закуп.
Висината на закупнината се определува во зависност од примањата на семејството што го користи станот, а за социјално ранливите категории, корисници на социјална помош ќе нема закупнина.
Нерегулираниот статус на становите кои се користат бесправно по основ на сопственост или закуп, според плановите на Министерството за транспорт, треба да се реши до септември годинава.