Рот од Луксембург: Мораме да му дадеме време на Бундестагот до октомври за Северна Македонија
Објавено во: Балкан 18 Јуни, 2019
Михаел Рот, германскиот министер за Европа, истакна дека одлуката за доделување на датум за преговори со ЕУ на Северна Македонија и Албанија оди процедурално преку германскиот Бундестаг и поради тоа е потребно да му се даде време до октомври.
Ова тој го порача по пристигнувањето на состанокот на министрите за надворешни работи на земјите-членки во Луксембург, каде треба да се донесат заклучоци по позитивните извештаи од Европската комисија за двете земји од Западен Балкан.
„Разбирам дека се работи за важни прашања за партнерските земји, но мораме да му дадеме време на Бундестагот. Се надевам на позитивен исход колку е можно побрзо, до октомври“, изјави Рот.
Рече дека во прашање е почеток на долги и тешки преговори, но станува збор за кредибилитетот на ЕУ и стабилизирање на демократијата, владеењето на правото и слободата на медиумите во двете земји кои нема да функционираат без ЕУ.