РУСИ: Војната меѓу САД и Северна Кореја сега е реална и многу опасна

Добивај вести на Viber

Во извештајот подготвен од Кралскиот институт за безбедност на Велика Британија (РУСИ) се вели дека војната меѓу САД и Северна Кореја сега е реална и многу опасна опција. 

Во анализата, објавена од весникот „Индипендент“, се вели дека војната нема да биде „хируршки прецизна”, туку „крвава и долга”. РУСИ додава дека „во случај на напад на било која од двете земји, целиот свет би имал максимално неколку часа да одлучи како ќе одговори на таа кризна ситуација“.

„Војната меѓу Северна Кореја и САД веројатно ќе резултира со убивање и ранување на стотици илјади луѓе. Тоа би значело голема инвазија на Северна Кореја, како и застрашувачки ефект врз целиот регион“- пишува во извештајот на британскиот институт.

Директорот на Институтот, Малколм Чалмерс изјави дека војната би можела да ја започне било која страна, но „многу веројатно е дека Доналд Трамп би можел да одлучи да го реши проблемот порано, а не подоцна“.

Британскиот институт во извештајот изложил неколку начини за почеток на војната.

Како што пишува „Индипендент“, Вашингтон може да биде испровоциран да нападне доколку севернокорејски ракети паднат во близина на Калифорнија или Гуам, американски територии во Тихиот Океан.

„Доколку Северна Кореја поверува дека САД ќе извршат „превентивен напад“, Ким Џонг-ун би можел да нереди напад“ - вели Чалмерс.

Војната со зборови на реалција Вашингтон-Пјонгјанг, која трае повеќе месеци, постепено го турка светот кон судири. Наместо да ги смируваат тензиите, лидерите на двете земји уште повеќе ги потпалуваат.