Руски медиуми со прогноза: Ќе има стагнација, ќе трае речиси 20 година
Објавено во: Економија, Свет 31 Октомври, 2016
Русија влегува во речиси 20-годишна стагнација поради која земјата конечно ќе заостане зад најголемите економии во светот, пишува „Независимаја газета".
Во најдобар случај Руската Федерација може да постигне економски раст од 2,1% годишно, но не и повеќе. И тоа не се проценки на странски аналитичари, туку рејтингот на руската влада, истакнува весникот, цитиран од BBC. Таква е според „Независимаја газета" долгорочната буџетска прогноза до 2034 година, поднесена во Државната дума заедно со проектот за федерален буџет за наредните три години.
Изданието пишува дека денешниот економски модел на Русија е осуден на пропаст, па дури и ако властите се обидат итно да остварат структурни реформи, во наредните децении ситуацијата нема радикално да се промени.
„Како што излегува, Владата потврди дека земјата ја чекаат речиси 20 години несовесен економски раст, кој при денешниот инвестициски глад е соодветно да го наречеме стагнација"- пишува весникот.
Владата потврдува и дека јазот меѓу Русија и другите најголеми економии во светот само ќе расте.
Русија не ќе може да ги надмине развиените земји, но нема ни да ги стигне.