САД: Го поддржуваме правото на протест на Кинезите
Објавено во: Свет 29 Ноември, 2022
САД официјално ги поддржаа луѓето во Кина кои протестираат против строгите мерки на владата против коронавирусот.
На луѓето треба да им се дозволи правото да се собираат и мирно да протестираат против политиките, законите или диктатите на кои се спротивставуваат - изјави за новинарите портпаролот за национална безбедност на Белата куќа, Џон Кирби и додаде дека Белата куќа го поддржува правото на мирен протест.
Тој додаде дека САД не добиле никакви барања од Кина за вакцини, откако некои експерти сугерираа дека кинескиот претседател Кси Џинпинг можеби ќе мора да увезе западни вакцини доколку одлучи да ги релаксира политиките на неговата земја во борбата против коронавирусот.
Кина и САД имаат многу тензични односи во последниве години. На првиот американско-кинески самит меѓу претседателот Кси и претседателот Џо Бајден беа разменети недипломатски зборови и стана јасно дека остануваат тешките односи меѓу двете најголеми светски сили.А
Односите дополнително се заладија кога претседателката на Претставничкиот дом на САД, Ненси Пелоси, го посети Тајван во август, што ја налути Кина. Сепак, се чини дека средбата на Бајден и Кси на самитот на Г-20 повторно ја отвори комуникацијата меѓу двете земји.