САД и ЕУ на иста линија: Поддршка за СЈО и непречена работа за Јанева

Добивај вести на Viber

Откако пратениците на владејачката коалиција денеска не ги поддржаа барањата на Катица јанева и СЈО за измена на законот за заштитени сведоци и продолжување на рокот за работата на обвинителството, со соопштенија се јавија американската амбасада и Делегацијата на ЕУ во Скопје. Тие порачаа партиите потписници на договорот од Пржино да се придружуваат кон обврските и да им овозможат на Јанева и нејзиниот тим непречена работа и ја повторија својата поддршка за СЈО. 

„Ги охрабруваме сите партии да се придржуваат кон обврските преземени со договорите од Пржино и од 20 јули за да осигураат веродостојни избори и непречена работа на Специјалното обвинителство и на независните набљудувачи на медиумите“, се вели во соопштението на Американската амбасада во Скопје.

„Воспоставувањето отчетност за неавторизираните прислушувања и сомнежите за владина злоупотреба се суштествени за да може Македонија да излезе од продолжената криза. Веруваме дека се разумни барањата на СЈО за поддршка на темелна, независна истрага на фактите“, велат уште од амбасадата.

„Улогата на СЈО беше договорена од сите партии, како дел од Договорот од Пржино. Сите партии повеќепати се обврзаа да ја поддржат работата на СЈО. ЕУ ги охрабрува сите да дејствуваат во согласност со своите обврски и ја истакнува важноста на отчетноста“, соопштија од Делгацијата на ЕУ во Скопје.

Инаку Катица Јанева за Фактор денеска изјави дека СЈО ќе продолжи да инсистира да бидат изгласани измените на Законот за Специјалното јавно обвинителство и на Законот за заштитени сведоци.

„Овој или следниот парламентарен состав ќе мора да ги усвои потребните измени на Законот за Специјалното јавно обвинителство“, смета Специјалната јавна обвинителка.

Според Јанева, СЈО со несмален интензитет ќе работи на сите случаи побврзани со аферата „Прислушување“ за кои постојат индиции за против законско работење.

„Не исклучувам и понатаму да продолжат обидите за опструирање на нашата работата, но СЈО ќе ги користи сите механизми за непречено функционирање и нема да отстапиме од она што е наша мисија и задача, порача Специјалната јавна обвинителка, Катица Јанева.