Санторињос: Сложено име за севкупна употреба и промена на Уставот

Добивај вести на Viber

Заменикот министер за поморство на Грција, Нектариос Санторињос, истакнува дека  преговорите продолжуваат на ниво на министри за надворешни работи, во однос на средбите во Виена, без притоа да открие дополнителни детали за разговорите меѓу двајцата шефови на дипломатиите и медијаторот Метју Нимиц.

Во интервју за грчката телевизија Скај,  Нектариос Санторињос  ги повтори грчките позиции за сложено ерга омнес име, објаснувајќи дека „не може да го смениш името за севкупна употреба и за во внатрешноста на земјата, ако не го смениш Уставот“.

„Нашата позиција е јасна сложено име за севкупна употреба и кога велиме за севкупна употреба мислиме и во внатрешноста на соседната земја. Кога велиме за севкупна употреба, предуслов е промена на Уставот“,  истакна Санторињот.

Тој смета дека е особено важно тоа што Македонија направи промени во имињата на аеродромот и автопатот, што, според него, е важен чекор и „отстапување од иредентизмот“.

Во однос на несогласувањата од коалициониот партнер во владата во Атина, Панос Каменос, Санторињос вели дека Грција, веќе одамна има прифатено име со терминот Македонија.

„Во овој момент немаме една земја што нема име. Има име, секако привремено име за кое имаме потпишано ние, во кое е вклучен терминот Македонија и исто така имаме и 130 земји што ја имаат признаено под нејзиното уставно име“, истакна Санторињос.