Сарачини ја повика дијаспората да инвестира во земјава
Објавено во: Економија 16 Јануари, 2014
Министерот за економија Ваљон Сарачини од Тетово ја повика дијаспората повеќе да инвестира во Македонија. Цел ни е и приватните трансфери од странство во државава да се конвертираат во конкретни инвестиции со што ќе се отворат повеќе работни места, истакна Сарачини на конференцијата Дијаспора Инвест.
Тој ги презентираше предностите за инвестирање во Македонија - договори за слободна трговија со сите земји во Европа, отвореност кон пазар од 650 милиони жители, најдобар даночен пакет, како и серија мерки за подобрување на инвестициската клима.
Според официјалните статистички податоци во 2012 година приватните трансфери од странство во државава изнесувале околу 1,6 милијарди евра или 20 отсто од бруто домашниот производ, што ги прави исклучително важни за македонската економија.„Овие приватни трансфери се за 8 до 10 отсто поголеми од директните странски инвестиции и целта е тие да се конверираат во конкретни инвестиции со што ќе се отворат повеќе работни места што пак ќе донесе и поголем економски развој. Министерството за економија со Агенцијата за странски иневстиции, општините и стопанските комори ќе продолжат да работат во оваа насока и очекувам во следниот период и официјализирање на вакви инвестиции од дијаспората во тетовскиот регион“, рече Сарачини.
Градоначалничката на општина Тетово Теута Арифи најави дека има идеја во општината да отвори канцеларија за врски со дијаспората.
„Во регионот има многу успешни приказни и ние сакаме да го дадеме својот придонес за враќање на инвеститорите што потекнуваат оттука“, рече Арифи.