САУДИЈЦИТЕ ДО МЕЃУНАРОДНАТА ЗАЕДНИЦА: Да се спротивстави на оние кои стојат зад нападот на нафтените постројки

Добивај вести на Viber

Mеѓународната заедница да го осуди нападот, бара Саудиска Арабија. 

Саудиска Арабија денеска ја повика меѓународната заедница „да преземе одговорност во осуда на сторителите“ и „јасно да се спротистави“ на оние што стојат зад нападот врз нејзините нафтени постројки во текот на викендот.

Кралот Салман нагласил дека Саудиска Арабија е во состојба да се одбрани од таквите „кукавички напади“.

Саудиската влада информираше дека нападите врз нафтеното поле „Арамко“ и голема рафинерија на сурова нафта се закана за меѓународната безбедност и глобалното снабдување со енергенси.

Нападот на саудиската рафинерија со дронови и крстосувачки ракети испрати силна порака, а тоа е дека дури и евтини оружја какви што користат Иран и Хутите, неговите сојузници во Јемен, можат многу лесно да победат милијарди долари вредна воздушна одбрана. Нападот беше ефикасно изведен затоа што директно го погоди главниот капацитет поради што се намали за пет отсто светското производство на нафта.

Поранешниот службеник во ЦИА, Боб Баер, одамна предупредуваше за ранливоста на рафинеријата во Абкаик. Во регионот стана јасно дека милијардите долари што Саудиска Арабија ги потроши на воздушна одбрана паднаа во вода пред евтината технологија.

Германската канцеларка, Ангела Меркел, денеска изјавила дека нападите во Саудиска Арабија не ги гледа како причина за завршување на германската забрана за извоз на оружје во таа земја.