Се прошири кругот на оние кои ќе добијат надоместоци од ДИК, на други ќе им бидат зголемени за локалните избори
Објавено во: Македонија 24 Ноември, 2021
Членовите на Државната изборна комисија нема да земат дополнителни надоместоци за локалните избори што завршија неодамна, но комисијата ги зголеми за останатите инволвирани, односно го прошири кругот на оние што ќе ја добијат.
На денешната седница тие изгласаа измена и дополнување на Правилникот за надоместоци на изборните органи за локалните избори.
-Членовите на ДИК освен нашите редовни плати нема да земат никави бонуси, иако имаме право на тоа, рече членот на ДИК, Борис Кондарко.
Надоместоците за други лица вработени во ДИК, лица дополнително ангажирани, членовите на ОИК и ИО остануваат да важат.
За исплата на надоместоци сега се додаваат и членовите на Избирачката комисија на Град Скопје. Се зголемува за 25 отсто надоместокот и за ОИК и ИО во општините каде што имаше втор круг гласање за градоначалник, како и за 20 отсто за избирачките органи во општините каде што имаше гласање на болни и изнемоштени лица.
Дополнителни надоместоци ќе има и за вработените во ДИК во подрачните одделенија и канцеларии на ДИК, како и за вработените во МВР кои го обезбедуваа доверливиот гласачки материјал и терминалите за отпечатоци од прсти.
Исто така ќе има и корекции на критериумите за вработените во стручната служба на ДИК кои извршувале задачи надвор од описот на нивното работно место според систематизацијата на ДИК, како и за сертифицираните едукатори.