СЕП: Пристигнаа респираторите од ЕУ
Објавено во: Македонија 24 Април, 2020
Денеска во Скопје пристигнаа респираторите кои се донација од Европската Унија за Македонија, објави Секретаријатот за европски прашања. Станува збор за 12 машини за асистирано дишење како и пет илјади заштитни маски „N95“, како дел од проектираната помош на Европската Унија од четири милиони евра за итни медицински потреби.
Респираторите кои денеска пристигнаа во земјава се произведени во Јужна Кореја, а според договорот потпишан на 3 април, останува преку УНОПС да се испорачаат уште осум респираторни машини или вкупно 20.
-Овие 12 машини ќе го зајакнат капацитетот на здравствениот систем за справување со епидемијата и соодветно третирање на пациентите, што е еден од главните предизвици во справувањето со епидемијата. Во овие сложени околности и отежнати услови за набавка на овие респираторни машини, набавката и доставата на овие машини претставува огромен успех, рече Бујар Османи, вицепремиерот за европски прашања и истовремено координатор за помош од странство. Наедно упати и благодарност до Секретаријатот за европски прашања, кој како што вели Османи во соработка со агенцијата на ОН, успеал да ги надмине сите технички, процедурални и транспортни предизвици за да ја обезбедат оваа сложена набавка.
Министерот за здравство Венко Филипче претходно исто така упати благодарност до Унијата и евроамбасадорот Самуел Жбогар, поради поддршката за здравствениот систем на Северна Македонија од четири милиони евра за справување со состојбата предизвикана од пандемијата од Ковид-19.