Шилегов: Обвинителството да почне да си ја работи работата онака како што треба

Добивај вести на Viber

Петре Шилегов, градоначалникот на Скопје, на брифинг со новинарите изјави дека градот го идентификувало непознатото лице снимено на безбедносните камери како ја уништува опремата за инсталирање на зелениот кров на ГТЦ побара притвор за сторителот, кој наводно не бил задоволен од тоа што не му било дозволено да направи летна тераса на истото место.

„Во текот на изминатата ноќ на покривот на Градскиот трговски центар, онаму каде што Градот Скопје инвестира за подигнување зелен покрив дојде до уништување на дел од опремата и на дел од инсталациите што Градот таму ги постави во соработка со УНДП. За наша среќа, безбедносните камери го снимија инцидентот, идентификуван е сторителот, Град Скопје и ГТЦ го пријавија случајот во МВР, извршен е увид и во тек е проценувањето на штетите. Оштетена е и инсталацијата, што претпоставува дека ќе стане збор за гонење за сторено кривично дело по службена должност. Доколку тоа се утврди, јас ќе побарам од јавното обвинителство да изрече мерка притвор за сторителот бидејќи не можеме како Град да дозволиме да биде уништувано јавното добро, да биде уништувано она што го правиме со парите на граѓаните, а и нека биде конечно предизвик за јавното обвинителство да почне да си ја работи работата онака како што треба“

Шилегов смета дека до сега ЈО не покажало сериозен однос како институција кон уништувањето на јавните добра и дека пријавата ќе биде доставена до МВР откако ќе се направи проценка на штетата. 

„Во координација сме со СВР Скопје и потоа ќе побараме од обвинителството да поднесе кривична пријава и да изрече мерка притвор бидејќи сторителот е познат и постои опасност да го повтори делото, рече денеска Шилегов.

На зелениот покрив на ГТЦ со површина од 1.800 квадратни метри ќе бидат засадени 29 висококвалитетни дрвја и повеќе од 30 други видови садници. Ќе бидат поставени неколку водени зони во форма на фонтани и базени, монтажна бина, партерно шаховско поле, кафе-бар, како и модерна урбана опрема од клупи, корпи за отпадоци и паркинзи за велосипеди.