ШТО ГИ СТОПИ ГРАЃАНСКИТЕ ДЕПОЗИТИ ВО АВГУСТ - има ли врска граѓанската обврзница, а еве што објасни монетарната власт

Добивај вести на Viber

Во јули имаше благо речено стагнација, но веќе во август позначајно намалување. Која е причината, Народна банка веќе даде објаснување, а веројатно попрецизно тоа ќе го разглобуваат и аналитичарите, но бројките говорат за сериозно намалување на депозитите на граѓаните во домашните банки во август оваа година.

Ако се спореди август со јули може да се забележи дека вкупните граѓански депозити доживеале месечен пад од нешто повеќе од 53 милиони евра, сведувајќи се на ниво од 5,39 милијарди евра, откако еден месец претходно беа на ниво од 5,45 милијарди.

Гледано по видови на граѓански депозити, она што создава непријатен впечаток е дека се намалиле драстично денарските депозити, и тоа за дури 72 милиони евра, со што сега тие на крајот на август изнесуваат 2,58 милијарди евра.

Додека, пак, кај депозитите во странска валута има благо зголемување, од 18 милиони евра, со што тие во осмиот месец од годината се на нивото од 2,81 милијарди евра.

Од Народна банка во своето последно соопштение на оваа тема дадоа објаснување на што се должи ова месечно намалување, и според нив, тоа е во целост одраз на падот на депозитните пари, притоа констатирајќи дека во август сепак има годишен раст во однос на истиот месец од минатата година.

„Во август, депозитите на домаќинствата се намалени за еден отсто во однос на претходниот месец, во целост како одраз на падот на депозитните пари, во услови на остварен раст кај останатите компоненти. Во споредба со август минатата година депозитите на домаќинствата бележат раст од 7 отсто, како резултат на повисоките долгорочни депозити во странска валута и во денари и депозитните пари, а во услови на забележан пад на краткорочните депозити во странска валута“, се вели во соопштението од НБМ.

Додека, пак, ако се погледнат јулските бројки, тие говорат дека вкупните граѓански заштеди имале скромен граѓански раст од три милиони евра, во тој месец, при што растот бил главно кај денарските влогови, и тоа за 2,7 милиони евра.  

А, токму јули беше интересен за опсервација, бидејќи во тој месец се издаде граѓанската обврзница, на сума од 23,5 милиони евра. Нивната камата беше 5 отсто, повисока од онаа што ја даваат банките на штедењето, колку и да е таа зголемена во последниов период. Тоа беше причина аналитичарите да очекуваат граѓанската обврзница да ги намали граѓанските депозити во јули, но во тој месец тоа не се случи, напротив имаше благ раст. Но, затоа во август имаме сериозен пад на граѓанските заштеди, и тоа најизразен кај оние што се чуваат во денари.

Ова, пак, следува откако претходно депозитите во нашите банки растеа постојано и секој месец во целиот изминат период, па дури и во месеците на екстремно висока инфлација, која реално ги обезвреднува граѓанските заштеди. Во јуни имавме зголемување на граѓанските депозити за дури 63 милиони евра. И гледано по валута, радуваше фактот што во јунии граѓаните се повеќе го преферирале домашниот денар како опција за штедење, па дури во јуни повеќе депонирале во денари, отколку во странска валута. Или, само за еден месец, тие во јуни пораснале за 48,5 милиони евра во споредба со мај.

Ова беше причина за дополнителна радост кај монетарните кругови, кои нагласија дека заштедите во јуни ги надминале очекувањата.

„Во монетарниот сектор, последните податоци заклучно со јуни 2023 година и натаму упатуваат на забрзан раст кај депозитите, којшто ги надмина очекувањата, со поволни поместувања во валутната и рочната структура, поточно пораст на штедењето во домашна валута и на долг рок“, напишаа во соопштение тогаш од централната банка.

Н.Н.Ф.