Што очекуваат Грците од средбата Заев - Ципрас?
Објавено во: Балкан 14 Мај, 2018
Грчкиот алтернативен министер за надворешни работи, Јоргос Катругалос, во интервју за грчкото радио „Реал фм“ изрази воздржан оптимизам за можноста за решение во пресрет на средбата на премиерите на Македонија и на Грција, Зоран Заев и Алексис Ципрас во Софија.
„Направена е систематска работа, прашањата се стигнати до нивното јадро и сега е време да се разговараат на највисоко ниво. Имаме воздржан оптимизам дека може да имаме договор“ – вели Катругалос.
Тој ги демантира информациите објавени во медиумите во Грција во текот на викендот, за одреден временски рок и преоден период за имплементација на договорот.
Вели дека договорот нема да наликува на Времената спогодба, ќе биде комплетен и нема да остава „опашки“, затоа што во спротивно нема да биде согласно со поставените грчки предуслови.
„Може да има временски период за прашањата што не можат да се решат во моментот на потпишувањето, но во никој случај нема да биде Времена спогодба како претходно“ – објаснува Катругалос.
Како што јави дописничката на МИА од Атина, алтернативниот шеф на грчката дипломатија изрази убеденост дека договорот што владата ќе го донесе ќе биде национално корисен и ќе добие поддршка од парламентот.
Во однос на информациите за зголемено парламентарно мнозинство од 180 пратеници, Катругалос вели дека Уставот такво нешто предвидува само кога станува збор за отстапување на националниот суверенитет, а во конкретниот случај не постои такво нешто.