Скапиот пресадувач на дрва бил употребен само еднаш до сега
Објавено во: Економија 22 Јуни, 2018
Скапата машина за пресадување на дрва, купена од Град Скопје додека градоначалник беше Коце Трајановски, била употребена само еднаш во последните две години откако е купена.
Машината што требаше да биде спас за стотици здрави дрвја што не мора да се исечат, туку можат да се преместат на друга локација, интервенирала само еднаш за да се преместат четири дрвја од Кејот на Вардар во паркот „Македонија“. Тогаш се покажало дека камионот е целосно неупотреблив во Скопје и дека од тогаш стои неупотреблив на паркинг, велат од Град Скопје за „Независен“.
.Директорот на јавното претпријатие „Паркови и зеленило“, Ардијан Муча, вели дека камионот е толку голем што е невозможно да се управува по градските улици. Уште поголем проблем за пресадување дрво со корен во Скопје се и подземните инсталации, кои се поставени многу плитко. За да преживее, дрвото мора да се извади со корен над 1,2 метар, а во делови од градов водоводот, канализациите и телекомуникациските врски се поставени многу повисоко.
Заедно со камионот за пресадување, во еден од хангарите на јавното претпријатие, неупотреблив лежи и мултифункционален трактор. Со него може да се чистат канали, да се сечат дрвореди и да се чистат улици. Машината, вели директорот Муча, е тешка 7,5 тони и е небезбедно да се движи на трева бидејќи ќе пропадне. Двете машини заедно беа купени за околу 450.000 евра во 2016 година.