Скопјанец без возачка дозвола со мотор удрил 10-годишно девојче пред училиште во Чаир

Добивај вести на Viber

Основното јавно обвинителство Скопје информира дека 33-годишен возач на мотоцикл е осомничен за тешки дела против безбедноста на луѓето и имотот во сообраќајот откако вчера удрил во 10-годишно девојче на пешачки премин пред училиште во скопски Чаир.

„По десната сообраќајна лента од улицата ”Џон Кенеди” управувал моторцикл „Пиаџо Беверли ” со скопски регистарски ознаки и тоа без заштитен шлем и без да поседува возачка дозвола од “A” категорија за тој вид на моторцикл.

Кога дошол пред влезот на основното училиште “Васил Главинов”, на обележан пешачки премин не обрнал внимание на пешаците кои започнале да чекорат и кои имал обврска да ги пропуштил.

Со предниот десен дел од моторциклот удрил во телото на оштетеното 10-годишно девојче кое го поминувало коловозот на пешачкиот премин. Од ударот девојчето се здобило со тешка телесна повреда – скршеница“, објасни ОЈО.

Јавниот обвинител со цел обезбедување на осомничениот во текот на постапката предложи да му бидат определени мерки на претпазливост – забрана за напуштање на живеалиштето, обврска да се јавува повремено на определено службено лице во Судот и привремено одземање на патна исправа за преминување на државната граница односно забрана за нејзино издавање. Судот го прифати предлогот и ги определи мерките.