Смениле единствено - малку граматика, малку додале зборови од други соседи - Захариева за македонскиот јазик
Објавено во: Македонија 03 Мај, 2020
Министерката за надворешни работи на Бугарија, Екатерина Захариева, смета дека треба Македонија да ја признае историјата, а Бугарија да ја прифати реалноста.
Захариева во интервју за бугарска телевизија вели дека, Македонија има статус на кандидатка за членство во ЕУ од 2005 година и „едвај сега, во 2020 година, Советот на ЕУ успеа да донесе одлука за почеток на преговори“. Според неа, во никој случај, вината за тоа не беше ниту на Бугарија ниту на Грција.
„Тоа е процес од над сто години, 75 години е државна политика. Тоа се многу поколенија. Ние имаме интерес тие да бидат во Европската Унија, да запрат со практиките од Титова Југославија, имаме интерес да ја признаат историјата, а во исто време, ние треба да ја признеме реалноста во моментов. Тоа е заемен интерес, според мене.“ - вели Екатерина Захариева МНР Бугарија.
На новинарското прашање дали тука треба да се додаде и македонскиот јазик, Захариева одговори дека оваа тематика е поврзана.
„Да, и јазикот, тоа е се поврзано. Толку документи има. Напишан е во 45-та година, на основа на западнобугарскиот дијалект. Смениле единствено некои… малку граматика, малку додале зборови од еден друг соседен јазик“, истакна Захариева во интервју за бугарската телевизија Канал 3.
За последните релации Скопје – Софија , бугарската вицепремиерка Захариева вели дека земјата е во предизборен период и мудра надворешна политика значи да не влегуваш во предизборна кампања. Според неа, ова е започнато од ВМРО ДПМНЕ, но тие нема да реагираат, за како што вели – изборите поминуваат, соседите остануваат.