Со растот ќе ни требаат дури 70 години за да ја стигнеме ЕУ
Објавено во: Економија 29 Ноември, 2018
Македонија од 2.000 година има просечна стапка на раст од 2,8 отсто и со таков раст за 70 години би постигнала нивото на ЕУ.
Ако растот се зголеми на 5 отсто тогаш целта ќе се реализира за 30 години.
Oва го тврдат од Светска банка. Македонија има потенцијал да стане земја со високи приходи, за што е потребен одржлив економски раст.
Ова беше посочено на денешната презентација на анализата на Светска банка „Постигнување посветла иднина за сите“ во која се разгледува напредокот на Република Македонија во текот на 27 години по остамостојувањето.
„Со постигнување на договорот со Грција, државата направи одлучен чекор во долготрајниот спор околу нејзиното уставно име. Разрешувањето на спорот за името кој предизвикуваше политичка и економска штета уште од 1991 година се очекува да го забрза процесот на пристапување на земјата во ЕУ и НАТО, да овозможи подлабоко да се интегрира со регионалните и со светскиот пазар“, се истакнува во анализата што денеска беше презентирана во Скопје од регионалната директорка на Светска банка за Западен Балкан Линда Ван Гелдер, претставникот на Светска банка во Македонија Марко Мантованели и Марко Хернандез, коавтор на извештајот.
Мантованели објасни дека Македонија се наоѓа во историски период и треба да надмине некои од политиките со кои беше опфатена неодамна.
Македонија е рангирана како земја со средни до високи приходи, но, како што беше посочено, има потенцијал да биде и со високи приходи за што треба да се спроведат одредени реформи.
Во анализата се наведени три патеки кои меѓусебно се надополнуваат за земјата да ги искористи новите можности за надминување на предизвиците. Првата е да поттикне подинамичен и поконкурентен приватен сектор, втората е вложување во луѓето за да се изгради конкурентна и приспособлива работна сила и третата се однесува на остварување економска социјална одржливост, како и одржливост на животната средина преку делотворно управување, фискална прудентност, како и подобрено управување со животната средина во насока на зголемена отпорност на природни несреќи и климатски промени.
За прогресивното оданочување, Мантованели посочи дека Македонија е една од земјите со најмали приходи и дека има простор за прогресивно оданочување, но при тоа да се има предвид да не се доведе во прашање ефикасноста.
Препораките властите не мора да ги земат в предвид, но треба да ги разгледаат.