СОБРАНИЕТО ЌЕ ВРАБОТУВА НАД 30 ЛИЦА: се бараат соработници, преведувачи, толкувачи за плати кои почнуваат од 32 илјади денари

Добивај вести на Viber

Собранието на Република Македонија ќе вработува дури 33 лица. На Агенцијата за администрација објавени се огласи со кои се бараат кандидати заинтересирани да работат во највисокото државно тело.

Условите за работа во Собранието се горе доле слични, се бара кандидатите да се државјани на Македонија, активно да го користат македонскиот јазик, да се полнолетни, здравствено способни и без судска забрана за вршење професија. 

Дополнително, потребни се:  активно познавање на компјутерски програми за канцелариско работење, положен испит за административно управување, активно познавање на англиски, француски или германски јазик  и положен правосуден испит. 

Се бара идните работници во Собранието да имаат високо образование, но за различни позиции има различни посебни услови.

Она што е забележливо е што платите за позициите за кои се бараат работници се движат од 32 илјади денари, па се до 53 илјади денари.

Меѓу позициите кои треба да се пополнат е Соработник за информирање на јавноста на албански јазик, кој треба да има факултет од областа наOпштествени науки - Право, Политички науки и Медиуми и Комуникации и најмалку 1 (една) година работно искуство во струката. За оваа позиција платата ќе достигнува 40.707 денари. Слична плата би имал и преведувач од македонски на албански и обратно, а секако треба да исполни и слични услови за добивање на оваа позиција.

Се бараат и повеќе помлади соработници, еден за секторот човечки ресурси, еден за јазична редакција на материјалите, како и за соработник за канцелариски и архивски работи. За овие три позиции платата ќе биде 37.758 илјади денари, а тие треба да ги исполнат истите услови како и претходните.

Меѓу повисоките плати ќе имаат лицата кои би ја добиле позицијата Советник на комитетот за односи меѓу заедниците и Советник за толкување од македонски на албански јазик, како и советник истражувач на пазарната економија. За овие три позиции плата достигнува до 47.303 денари.

Доста примамлива плата има и за позицијата Раководител на одделение за умножување и комплетирање на материјали 53.434 денари, како и раководител на одделение за документација. Се бара и раководител на одделението за поддршка на работата на претседателот на собранието, кој исто така би добивал плата над 53 илјади денари.

Спротивно на нив, најниската плата е за позицијата помлад референт за мултилатерална соработка кој ќе добива 32.404 денари плата, додека пак техничкиот секретар ќе добива малку повисока плата од 32.714 денари.

Дел од огласите истекуваат во следните денови, поточно на 13 декември, додека друг дел на 15, 16, 17 ... па се до 20 декември. Сите детали на веб страната на Агенција за администрација.