Сочна дивиденда! Колку пари носи секоја акција на „Реплек“
Објавено во: Економија 10 Март, 2020
Реплек останува компанија која дели солидни дивиденди на своите акционери и тоа го прави во континуитет. За успешното работење лани акционерите ќе гласаат за предлогот – дивидендата да изнесува 61 евро по акција во нето износ.
„Реплек“ една од најголемите компании специјализирани за трговија со фармацевтски производи и медицинска опрема и годинава ги израдува своите акционери. Неговите акционери на претстојното собрание ќе одлучат за предлогото компанијата да додели 61 евра нето дивиденда за секој акционер. Иако дивидендата е пониска од претходната година мора да се признае дека „Реплек“ држи ниво и го гради својот имиџ на компанија која мисли и солидно ги наградува своите акционери. „Реплек“ ќе исплати 1,76 милиони евра дивиденда во бруто износ. Од тоа 1,3 милиони евра се обезбедени од добивката што „Реплек“ ја оствари од работењето лани, а останатите 460.000 евра се добивка што компанијата ја обезбеди како дел од законските резерви.
Кои се акционерите на „Реплек“ кои ќе добијат најмногу?
Во таа група се и идните пензионери на задолжителниот отворен пензискиот фонд „Сава пензиски фонд“. За своите 7 отсто од акциите фондот ќе добие 111.000 евра дивиденда од „Реплек“.
Најдобитни се тројцата најголеми поединечни акционери: странскиот државјанин Душан Пецовски – најголем поединечен акционер и братот и сестрата Туџарови: Иван и Славица.
Душан Пецовски поседува 11,9 отсто од акциите со право на глас и тоа е износ од 188.000 евра во нето износ. Пецовски е член на Одборот на директори на компанијата од 27 мај годинава.
Славица Туџарова Трајковска поседува 11,57 отсто од акциите со право на глас во „Реплек“. За нив таа ќе добие нето износ од околу 183.000 евра.
Нејзиниот брат Иван Туџаров е претседател на Одборот на директори на „Реплек“ и трет најголем акционер во таа компанија. Тој поседува 11,3 отсто од акциите и за нив ќе добие околу 183.000 евра нето дивиденда.
Останатите над 250 домашни физички лица акционери во „Реплек“ ќе поделат околу 693.000 евра нето дивиденда.
„Реплек“ лани оствари консолидирани приходи во износ од 18,5 милиони евра и консолидирана добивка од 2,2 милиони евра.