Сопственикот на „Аитоникс“ влегува во бизнисот со струја

Добивај вести на Viber

Јордан Димитровски, сопственикот и генерален директор на „Аитоникс“, влегува во бизнисот со производство на електрична енергија. Еден од најпознатите бизнисмени во ИКТ-секторот го регистрирал правниот субјект „Виан Енерџи“, но вели дека засега е рано за конретни одговори за проектот.

- „Виан Енерџи“ е новосоздадена компанија која се уште нема отпочнати активности. Како што е наведено и при самата регистрација на компанијата, истата има намера да разработува проекти во секторот на енергетика, но е потребно време за да се дефинираат деталите околу бизнис планот, концептот, инфраструктурата и конкретните чекори со кои би започнале со работа. Затоа во моментов не би можеле да споделиме повеќе информации, а истото со задоволство би го направиле откако ќе започнеме со дејност, вели Димитровски.

AITONIX е една од најголемите компании за IT дистрибуција и изработка на софтвер која оперира на македонскиот пазар и на пазарите во соседните Балкански држави (Албанија, Косово, Бугарија), а годишно во просек има обрт од околу 10 милиони евра.

AITONIX е официјален дистрибутер на некои од најпознатите светски IT брендови, а освен дистрибуција на IT производи, компанијата има експертски оддел за развој на специјализирани софтверски решенија.

Од нејзиното основање во 2002 година, денешен „Аитоникс“ беше познат како „ТДК Компјутери“. Така е сѐ до 2018 година, кога друштвото одлучи да се ребрендира.

Аитоникс АД Скопје за 15 милиони евра во 2020 во конзорциум со операторот Крејон Македонија доби јавна набавка за софтверски лиценци за Владата, вклучувајќи и други државни органи, јавната администрација и едукативните институции по склучениот тригодишен договор со Генералниот секретаријат.

А.К.