Спикерот порача: Само ако се усогласи законот и се најдат 80 пратеници - ќе се стави на дневен ред
Објавено во: Македонија 30 Јануари, 2020
Собранискиот спикер Талат Џафери вели дека кога ќе има конкретен предлог во врска со Законот за јавно обвинителство, тој ќе го стави во собраниска процедура.
„Законот за јавното обвинителство е веќе на дневен ред од минатата година, на седницата 108. Имаше неколку измени во тој предлог, околу 60, од кои некои беа прифатени. Има најави дека ќе има нов предлог. Кога ќе имам нов предлог, ќе продолжам. Доколку сите страни се согласат за текстот на новиот предлог, во контекст на постапката, тој може во рок од еден ден да биде одобрен“, изјави Џафери.
Законот за ЈО, всушност, ќе се стави на дневен ред на собраниска седница само доколку има усогласеност за текстот и се обезбедени 80 гласови.
Во врска со законот за одбрана, Џафери рече дека тоа не е услов за членство на земјата во НАТО.
„Никој во ниеден момент во процесот на пристапување не ни стави како услов… Да не си дадеме дополнителни услови затоа што овој закон не е дополнителен услов за целосно членство во НАТО “, рече Џафери.