Србија меѓу првите ќе ја признае земјава под новото име
Објавено во: Балкан 26 Јануари, 2019
Српскиот претседател Александар Вучиќ вечерва им честиташе на премиерите Зоран Заев и Алексис Ципрас на ратификацијата на Преспанскиот договор.
„Ние не се мешаме во внатрешните работи на други држави, кога договорите се постигнати и донесени. Србија им честита и на Скопје и на Атина. Србија ќе биде една од првите држави, кои својот јужен сосед ќе го признае под новото уставно име. Сакаме најдобри можни односи и со двете земји и уште еднаш им честитам на господинот Заев и Ципрас“, истакна Вучиќ.
На прашањето за тоа колку овој договор ќе придонесе за добриот развој на односите меѓу Србија и Косово, рече дека „постојано за ова слуша приказни“, но нагласи дека „тука се работи само за името“.
Вели дека проблемите со Косово се сто пати потешки.„Да, ние сакаме да го решиме, само немојте да ги поистоветувате, бидејќи тоа се драматично различни проблеми и според тежината и според последиците и по сѐ останато“, рече Вучиќ.
Според него, политиката на Србија, а пред сѐ заради младите, е политика на регионалната стабилност и поликата на отворени граници.