Србија нема да подигнува огради на своите граници

Добивај вести на Viber

Србија нема да крева ограда на своите граници, увери премиерот Александар Вучиќ во интервју за германскиот весник "Ханделсблат".

"Без разлика дали Хрватска ќе подигне ограда на границата со Србија, мојата влада нема да крева огради на државните граници, ниту кон Бугарија, ниту кон Македонија", истакна Вучиќ.

Тој исто така, посочи дека неговата земја не се соочува со хистерија од бегалскиот бран, иако таму влегле двојно повеќе мигранти во споредба со Хрватска и Унгарија.

На прашањето дали се разочарал од некои земји, Вучиќ изјави дека сретнал многу политичари кои од бегалската криза сакале да ја искористат и при тоа се претставувале како нагласено европски ориентирани.

Запрашан што очекува од ЕУ во рамките на бегалска криза, Вучиќ изјави дека ја смета германската канцеларка Ангела Меркел како "вистинска водечка личност во Европа", но дека "ја мрази позицијата на некои актери од нашиот регион", кои "секој ден плачат и се жалат "колку многу имигранти влегле на нивната територија.

Во исто време на новинарско прашање на маргините на бизнис форум во Москва, каде што пристигна денес на официјална посета, Вучиќ коментира дека "очигледно на Балканот има повеќе тензии и обиди за сеопфатна дестабилизација на односите".

Според него "некој вложува многу напор" за дестабилизација на односите на Западен Балкан и тој знае, но не сака да каже кои се овие сили. Александар Вучиќ потврди дека "ќе стори сé за да го зачуваме мирот и стабилноста во регионот" и дека тоа е приоритетна цел на српската влада. "Ако некому се потребни мир и стабилност, тоа е Србија", истакна Вучиќ.