Србија воведува забрана за пушење на јавни места
Објавено во: Балкан 29 Декември, 2015
Со новите законските промени Србија во 2016 година се подготвува да воведе сеопфатна забрана за пушење на јавни места, пишуваат српски медиуми.
Забраната ќе важи и за сите ресторани.
Според пишувањата секое катче во кафулињата и рестораните ќе биде за непушачи, а пушењето ќе биде дозволено само на летните тераси.
„Пушачите нема да можат да уживаат дури ни во одделни простории со вентилација, какви сега има во многу кафулиња во трговските центри“.
Според актуелната регулатива пушењето е дозволено во локали над 80 метри квадратни, во кои сопствениците можат да одделат најмалку 50% од просторот за пушачите.
Новите измени во законот сепак предвидуваат целосна забрана за пушење на сите работни и јавни места. Ќе има само мали исклучоци за психијатриските установи, социјални објекти и затворите, каде пушењето ќе биде дозволено во посебни простории, а во нив ќе можат да пушат само пациентите и затворениците, но не и вработените.
Ќе биде забрането и производството на цигарите „Слим“ со вкус на ментол, и ќе биде воведена строга контрола врз електронските цигари.