ССМ: ГАЗДИТЕ ДА ЗНААТ - за работниците што ќе работат денеска и утре дневницата е 250 отсто
Објавено во: Македонија 06 Јануари, 2021
Најголемиот синдикат во земјава ги потсетува газдите дека на работниците што ќе работат на овие празници, денеска и утре, ќе треба да им се исплатат дневници од по 250 отсто.
„Согласно Законот за празниците, денешниот ден, среда, 6-ти јануари 2021 година, Бадник, ден пред Божиќ, е неработен ден за граѓаните од православна вероисповед, а четврток, 7 јануари, Божиќ, е неработен ден за сите граѓани.
Согласно член 24, став 2 од Општиот колективен договор за приватниот сектор ,,За работа во денови на празници и неработни денови утврдени со закон, работникот има право на надомест на платата што му припаѓа кога во тие денови не работи и плата за поминатите часови на работа зголемена за 50 отсто", односно една дневница како за работникот кој не работи и една дневница зошто денеска работникот работи зголемена за 50 отсто или вкупно 250 отсто за работник кој работи на Државен празник!“, се вели во соопштението од ССМ.
Оттаму велат дека работниците мора да бидат информирани за да не ги манипулираат алчните газди, а сите злоупотреби да се пријават во ССМ, за Синдикатот да може да ги спречи.