Стопанска банка Битола растури! Расте кредитирање, зголемени депозити, ослободени резервации

Добивај вести на Viber

Во услови на силна конкуренција Стопанска банка Битола успеа да оствари профит што е четири пати поголем од 2020 година. Банката го зголеми кредитирањето, ги одржа нето приходите од кредити, ги зголеми нето приходите од провизии и ослободи 4,6 милиони евра од резервациите за ризични пласмани

Стопанска банка Битола имаше извонредна деловна година. Во услови на острата и најбројна конкуренција на средни банки во нашиот систем оваа банка лани оствари добивка што е за 4 пати повисока од профитот во 2020 година.

Лани Стопанска банка Битола успеа да ја одржи својата пазарна позиција и од најголемата приходна ставка акумулираше нето приход во износ од 4,7 милиони евра што е исто како и во 2020 година. Значаен раст лани оствари кај нето приходите од провизии и надоместоци. Резултатот е за 11 отсто подобар од претходната година и изнесува 2,48 милиони евра нето од провизии и надоместоци.

Иако станува збор за мало учество во вкупните приходи значајни растови на нето износи банката книжи кај нето приходите од курсни разлики (24 отсто повеќе од претходната година) и износ од 434.000 евра. Слично е зголемувањето и кај останатите приходи од дејноста. Лани достигнале 462.000 евра и се за речиси 20 отсто повисоки.

Клучно влијание врз добивката која изнесува 5,6 милиони евра имаше и позитивното салдо на резервациите за ризички кредити. На крајот на 2021 година банката ослободи 4,57 милиони евра резервации што е за 12 пати подобар резултат во споредба со 2020 година.

Токму ова во најзначајна мерка влијаеше позитивно на работењето на оваа банка.

На страна на билансот на состојба, резултатите се охрабрувачки и позитивни. Банката обезбеди раст на кредитните пласмани за 3,5 отсто во однос на 2020 година и тие достигнаа ниво од 112,9 милиони евра. Вложувањата во државни хартии од вредност во овој период достигнаа 3,8 милиони евра. Иако се многу мали во вкупната структура на вложувања тие се за 3 пати повисоки од 2020 година.

Лани вредноста на превземените средства за неплатени кредити достигнаа вредност од речиси 2 милиони евра што е за 2 пати повеќе од износот на превземените средства на крај на 2020 година.

Депозитната база на Стопанска банка Битола е зголемена за 10 милиони евра и достигна 157 милиони евра.