Струмичката полиција поднесе кривична пријава за даночно затајување против газда и неговата фирма - го оштетиле буџетот за 13,5 илјади евра
Објавено во: Македонија 03 Февруари, 2022
Отсекот за економски криминал при СВР Струмица до ОЈО Струмица поднесе кривична пријава против Н.Б.(45) од Струмица и правен субјект со седиште во Струмица, поради постоење основи на сомнение дека сториле кривично дело „даночно затајување“, по член 279 од Кривичниот законик.
„Пријавениот Н.Б., во својство на управител на правниот субјект, во периодот од 01.01.2020 до 31.12.2020 не пресметал и не платил данок на личен доход во износ од 280.048 денари ( околу четири и пол илјади евра) со затезна камата за ненавремено плаќање во износ од 24.183 денари, што е спротивно на одредбите од членовите 84, 87, 89, 92 и 93 од Законот за личен доход. Исто така, во периодот од 01.01.2019 до 30.09.2021 не пресметал и не платил данок на додадена вредност во износ од 518.078 денари (околу осум и пол илјади евра), што е спротивно на одредбите од член 52 став 1 од Законот за данок на додадена вредност. Со ваквите дејствија пријавените предизвикале штета на Буџетот на Република Северна Македонија во висина од 822.309 денари (околу 13,5 илјади евра - н.з)“, се вели во соопштението од Полицијата.