СУДИЈКАТА КАЦАРСКА РЕАГИРА НА СПОТ НА ВМРО-ДПМНЕ: Отидоа предалеку, ова е злоупотреба на мојот лик

Добивај вести на Viber

Нова реакција за еден од рекламните спотови на ВМРО-ДПМНЕ. 

Добрила Кацарска, судијка во Кривичниот суд, реагира на еден од спотовите во кампањата на опозициската партија, во која се користи нејзиниот лик. 

Таа смета дека во овој спот станува збор за злоупотреба на нејзиниот лик и име, за што во понеделник ќе поднесе претставка и до Агенцијата за ауудио и аудиовизуелни медиуми.

„Подолг временски период лидерот на ВМРО-ДПМНЕ, Христијан Мицкоски, го споменува моето име, нарекувајќи го судството во земјава Кацарска судство. Но, сега се отиде и подалеку, односно моето презиме и мојот лик се употребуваа и во претседателската кампања, а се продолжи и на овие парламентарни избори“, вели Кацарска за Фактор.

Таа потенцира дека партиите добиваат државни пари за да ја рекламираат својата програма и својата кандидатура.

„Со оглед што јас не сум кандидат за пратеник на ниту една политичка партија, сметам дека Мицкоски и неговата партија ги злоупотребуваат парите на даночните обврзници. Посебно овде би нагласила дека мојата работа е позитивно оценета од Стејт Департментот, Европската унија и ОБСЕ. Би сакала да нагласам дека во третиот конечен извештај на ОБСЕ, кој се однесува за работењето на судиите по предметите на СЈО, јасно е наведено дека начинот на кој јас сум ја водела постапката и начинот како беа изведувани доказите во предметот во јавноста познат под кодно име Тенк, треба да слуќи за промер на другите судии. Конечно, со ваква кампања Мицкоски покажува дека не е за борба против организираниот криминал и корупцијата, па можеби тој како кандидат за премиер, пушта јасна порака дека ќе го штити криминалот и корупцијата. Значи ли ова дека Мицкоски ќе ги поддржи судиите кои ќе работат спротивно на законот“, прашува судијката Добрила Кацарска.

Н.Н.Ф.