СУДИЈКАТА ЗГРОЗЕНА: Кацарска бара Судскиот совет да ги испита тврдењата на Стефанова

Добивај вести на Viber

Судскиот совет да ја утврди фактичката состојба и да ги испита тврдењата на обвинителката Лиле Стефанова која во сведочењето за случајот „Рекет“, изјави дека токму судијката Добрила Кацарска преку колега обвинител и вршела притисок за притворот на бизнисменот Орце Камчев кој е осомничен во случајот „Империја“.

Ова го бара Кацарска. Таа се огласи со соопштение. 

„Со оглед да секогаш ја зборувам вистината и ништо не кријам, јас јавно пред целата македонска јавност кажав дека фамилијата Камчеви се наши фамилијарни пријатели, но таа моја искреност не смее да се злоупотребува од било кого, а посебно не од Јавен обвинител бидејќи штетните последици од изнесување на невистини доведуваат до нарушување на угледот на оној на кого се однесуваат, а имајќи во предвид дека ја извршувам функцијата судија, се нарушува и угледот на судиската функција воопшто, кое нешто во никој случај не сакам и не смеам да го дозволам. Имајќи во предвид дека на ваков начин се нарушува мојот углед и достоинство, а воедно се нанесува и штета на функцијата судија, барам од вас како надлежен орган да ги утврдите сите факти и да ги прибавите сите докази за утврдување на фактичката состојба со цел јавноста да ја дознае правата вистина“, реагира Кацарска.

Таа се огласи по три дена со реакција, откако беше спомената во судница. 

За шефицата на организиран криминал, Вилма Русковска недозволиво е однесувањето на Стефанова, и таа ја искритикува колешката Лиле Стефанова која како сведок во „Рекет“ ја посочи и судијката Добрила Кацарска како една од оние кои се јавувале во Империја.

„Секој што има сознанија и мисли дека некој судија постапува непрофесионално треба да го пријави во Судски совет. Колешката Стефанова, како обвинител, треба да ја знае таа процедура. Недозволиво е вакви сомневања, после година и пол, да се изнесуваат во судница и притоа да не биде известен Судскиот совет“, рече Русковска. 

Екс обвинителката од СЈО, Катица Јанева бурно реагираше по сведочењето на Стефанова. 

Oваа недела имаше сведочења за „Рекет“, при што јавноста дозна нови детали за случајот.