Светска банка остана без претседател, Бугарка ќе седне на ова столче
Објавено во: Економија 07 Јануари, 2019
Претседателот на Светската банка поднесе оставка, a на негово место ќе дојде Бугарка.
Претседателот на Светската банка, Џим Јонг Ким објави дека поднесува оставка од челната позиција на институцијата од 1 февруари, четири години пред крајот на неговиот мандат.
Ким вели дека ќе се приклучи кон една компанија и ќе се фокусира на вложувања во инфраструктурата во земјите во развој.
„Ми беше чест да служам како претседател на една олку угледна институција“, вели во соопштението, Јим Јонг Ким.
Сепак, тој не ги наведува причините за оставката.
Кристалина Георгиева е новиот претседател на Светската банка, започнувајќи од 1-ви февруари. Поранешната бугарска комесарка привремено ќе ја извршува функцијата претседател на една од највлијателните меѓународни организации за финансиска и експертска помош. Таа има вкупно 17 години кариера во банкарскиот сектор.
Нејзините шанси да биде претседател со целосен мандат се минимални, затоа што традиционално американски државјанин е на чело на институцијата. Георгиева со месеци ќе раководи со Светската банка, сѐ додека претседателот Доналд Трамп не најде соодветен кандидат кој ќе го предложи на Управниот одбор на СБ.
Пред две години, Георгиева објави дека лично е поканета од претседателот Ким да ја преземе функцијата главен извршен директор на Светската банка.