Тимоние на средба со Шеќеринска: Вратите на НАТО се отворени
Објавено во: Македонија 19 Јуни, 2017
Унапредувањето на одбранбената соработката меѓу Македонија и Франција е од големо значење за заедничкиот придонес кон мирот, стабилноста и безбедноста на Балканот и пошироко, беше потенцирано денеска на средба помеѓу министерката за одбрана, Радмила Шекеринска и амбасадорот на Република Франција Кристиан Тимоние, во Министерството за одбрана.
Шеќеринска рече дека реформите кои ќе ги спроведат во областа на одбраната се важен влог за побрзо интегрирање на земјата во НАТО, но и во ЕУ.
„Ќе работиме да создадеме амбиент на доверба и подобра регионална соработка. Резултатите кои ќе ги постигнеме ќе ја зацврстат поддршката на земјите членки за влез на Македонија во НАТО. Со членството на Република Македонија во НАТО ќе се зацврсне стабилноста и безбедноста на целиот регион“ - изјави Шекеринска.
Тимоние додаде дека вратите на НАТО се отворени и дека неговата земја е заинтересирана соработката со Македонија да се унапреди. Се разговараше и за можноста за унапредување на соработката меѓу Македонија и Франција во однос на модернизацијата на АРМ.
На денешната средба присуствуваше и новото одбранбено аташе на Република Франција во Република Македонија, Жан Марк Лавали на кого министерката Шекеринска му посака добредојде и му посака успешна соработка и продлабочување на истата во периодот што следи.