Тргнат банерот со „северномакедонска“ кујна на саемот во Берлин

Добивај вести на Viber

Министерството за земјоделство, шумарство и водостопанство, стави нов банер на македонскиот штанд на саемот за храна и земјоделство „Зелена недела“ кој се одржува во Берлин. Оттаму информираат дека била направена „техничка грешка“ и дека сега е поправена. Имено од завчера на социјалните медиуми имаше бурни реакции што на рекламниот банер на Саемот беше напишано North Macedonian cuisine наместо Macedonian cuisine. На Саемот Македонија ја претставува фирмата Кадино, а таму на лице место се прават буреци, јадење кое се смета за традиционално во нашата земја.

„Веднаш по реакцијата од страна на МЗШВ до организаторот на саемот, е направен нов рекламен банер којшто е веќе поставен на македонскиот штанд на саемот. Имено, првичниот банер беше предлог на компанијата Кадино, којашто дизајнот го има препратено до организаторот на саемот. При тоа, направена е техничка грешка при преводот, за која што МЗШВ веднаш реагираше до организаторот, и во најбрз рок се подготви нов рекламен банер, стои во објавата од Министерството за земјоделство

Оттаму велат и дека МЗШВ веќе работи на покренување на постапка за утврдување на одговорноста кај лицата од министерството вклучени и задолжени во организацијата на саемот. 

Информираат и дека денеска македонскиот штанд го посетил светски познатиот критичар за храна, Дирк Хофман, кој го оценил македонскиот бурек како еден од највкусните и најуникатните традиционални производи. 

Штандот на МЗШВ бил еден од најпосетените на саемот, а дневно биле поделени над 300 пити, бурек и останати пецива.