Три лица починаа од листерија, изворот на бактеријата уште не се знае

Добивај вести на Viber

Седум лица за еден месец се инфицирале со бактеријата листерија во Македонија, јадејќи заразена храна. Три од нив починаа, меѓу кои две лица на возраст од 72 и 59 години и едно новороденче, соопшти Министерството за здравство. Листериозата е бактериско заболување, кое најчесто настанува по внесување на храна контаминирана со бактеријата листерија, како што е месо, преработки од месо, непастеризирано млеко и млечни производи, недоволно измиено овошје и зеленчук, димена риба и друго. Но, надлежните во Македонија засега не знаат што точно е извор на заразата. Препораките се општи - поголемо внимание при подготовка и консумација на храна, темелно миење на рацете пред поготовка и консумација на храна и почесто миење на рацете при подготовка, храната да се користи веднаш по подоготовка, а доколку не се употреби веднаш да се чува на температура од 2 до 8 степени и при повторна употреба да се загрее на температура над 70 степени, да не се консумира сирова или недоволно термички обработена храна, посебно месо и преработки од месо, непастеризирано млеко, млечни производи и јајца, сировата и подготвената храна во фрижидер да се чуваат одделно во посебни садови. Се препорачува и темелно чистење и миење на садовите, кујнскиот прибор, работните површини и рацете, пред и после ракувањето со храна - сирова или термички обработена. Свежиот зеленчук, овошјето и салатите треба темелно да се измијат под силен млаз вода - пред јадење, сецкање или готвење, па дури и кога се излупени. Да се избегнува храна од тезги на улица, брза храна, како и др. храна и вода од несигурни извори. Со цел да се најде изворот на заразата, центрите за јавно здравје направија теренски проширени епидемиолошки истражувања кај сите случаи со листериоза особено во однос на видовите храна консумирани во претходниот месец пред појава на симптомите. Комисијата за заразни болести ја задолжи Агенцијата за храна да изврши вонредни контроли во сите поголеми производствени погони за храна, магацини за чување и дистрибуција на храна. Агенцијата е должна да направи контрола на сите зелени пазари. Државниот санитарен и здравствен инспекторат ќе направи контрола на безбедноста на млекото наменето за доенчиња на одделенијата за неонатологија и педијатриски одделенија. Кај здрави лица со подобар имунитет, заболувањето со бактеријата листерија поминува со полесна клиничка слика, со стомачни проблеми, дијареа или симптоми слични на грип. Но, кај постари лица со намален имунитет, бремени жени и новородени деца може да предизвика сериозни компликации, како сепса, воспаление на мозочни обвивки (менинго енцефалит), воспаление на срцева обвивка (перикардит), воспаление на зглобови и сл.