Туристите за Нова година ќе бараат место повеќе во Крушево
Објавено во: Македонија 23 Ноември, 2021
Оваа година туристите ќе бараат место повеќе за престој за Нова година и Божиќ во Крушево.
Дел од сместувачките капацитети веќе се резервирани, велат од локалната самоуправа. Објаснуваат дека се најавени домашни, но и гости од регионот. Очекуваат дека за празниците и целиот месец јануари ќе имаат посетители во градот, и ќе настојуваат со почитување на ковид протоколите сите да бидат безбедни затоа што сега сме во време на пандемија.
„Ние сме во постојан контакт со сместувачките капацитети, има резервации, тие почнуваат од месец ноември. Има интерес за посета на Крушево за Нова година. Претежно се тоа домашни туристи, но ќе има и гости од соседите земји. Очекуваме дека цел јануари ќе имаме туристи, посебно ако имаме снег. Важно е да се каже дека се зголемени сместувачките капацитети во градот. Луѓето гледаат иднина во оваа сфера. Ако порано имавме гости три месеци во годината, и за викенди, сега се трудиме тој период без туристи да се смали и постојано да имаме посетители. Приходите од туризмот се многу важни за општината, затоа што наплаќаме туристичка такса, и тие пари потоа се инвестираат во проекти, со што парите се враќаат назад кај граѓаните“, вели Сотир Габелоски, лице за односи со јавност во Општина Крушево.
Oд Здружението за туризам и угостителство во Крушево додаваат дека со години традиционално за Нова година градот е полн со гости. Велат дека сите објекти кои се категоризирани, од средината на ноември се букирани.
„Ние како здружение посветуваме внимание на промоција на малцинските заедници, конкретно на влашката култура и традиција, за да не се сведе посетата на Крушево само на шетање на градот. Последно учевме да броиме на влашки јазик, учевме основни термини, зборувавме за истакнатите Власи, како Тоше Проески, Никола Мартиноски и други. Ги носиме луѓето во црквата Свети Јован, која се нарекува и влашка црква“, објаснува Лефкија Гажоска, од Здружението за туризам и угостителство од Крушево.
Таа додава дека сите угостители многу внимаваат на ковид протоколите, затоа што гостите треба да бидат задоволни и пак да се вратат во Крушево.
Секоја година илјадници луѓе ја посетуваат и Спомен куќата на Тоше Проески во Крушево.
Сања Атанасовскафото Викенд во Крушево